愛菲旋轉 - 3. 黃金少年（1）
物種源始．貝貝重生 #17
《愛虛構 Fiction Passion》即將獨立出版
由虛構作家為虛構愛好者所創作的虛構作品 Fictions created by fictional writers for fiction lovers
好運茶餐廳，愛菲在一邊吃飯，一邊看劇本。老闆七叔在看報紙。電視在播放新聞報道。
新聞報道員：V城大學最新嘅一項研究顯示，三十歲以下年輕人嘅社會向上流動率，經過接近二十年嘅不斷下降，今年終於有回升嘅跡象。之前好多人出嚟社會工作十幾年，依然置業無望，但係去年推出嘅青年居屋單位優惠計劃反應熱烈，有唔少二十幾歲嘅單身男女有機會上車。至於青年嘅就業率同入息中位數，亦都有輕微上升。有政府官員認為，政府推行嘅大重建計劃見到成效，年輕人嘅不滿有望減輕，社會和諧亦可以慢慢恢復。不過，有學者認為政府政策向年輕人傾斜，未必能夠解決社會嘅深層次問題。
學者：好多根深蒂固嘅問題，好似社會結構僵化同機會飽和，房地產炒賣過熱導致樓價過高，以及資源分配不公令貧富懸殊現象持續惡化，重有嘅係政制改革嘅停滯不前，都唔係推出一啲討好年輕人嘅措施就可以解決。甚至會令年紀較大嘅人覺得，點解最有能力但係又最冇建設性嘅一班人，反而會得到最多嘅好處？咁樣做完全無助於消解世代撕裂嘅問題。
商界領袖：幫年輕人一把唔係唔好，任何人都希望有個好啲嘅起跑點，但係宜家嘅年輕人已經越嚟越好逸惡勞，冇晒前代人嘅拼搏精神，盲目咁幫佢地只會縱壞佢地，令佢地會更加唔願意自我反省，而只係一味抱怨，甚至動不動就破壞社會秩序。
時事評論員：政府根本冇好好汲取三年前嗰場大海嘯嘅教訓，冇做好青年政策，俾年輕人多啲機會參與社會政治嘅事務。啲高官重停留喺用金錢利誘年輕人嘅舊思維當中，以為只要俾佢地過啲舒服啲嘅生活，啲年輕人就唔會對社會咁多不滿，對政治有咁多訴求。我擔心咁樣落去，歷史會重演。
政府官員：你話歷史重演？我一啲都唔擔心。我相信我地嘅社會，包括年輕人同人紀較長嘅人，都已經從三年前嘅創傷復元，而且從中學習到，對抗同破壞並唔能夠解決問題，只有對話、溝通同誠意嘅合作，先至能夠改善同推進我地嘅社會。政府呢兩年推行嘅大重建計劃，成果有目共睹，而且惠及嘅肯定唔只係年輕人，而係各個不同階層同身分嘅人士。我地將會堅定不移地繼續深化同優化大重建計劃裡面嘅唔同項目，以V城整體嘅福祉為努力嘅目標。
新聞報道員：內地贈送俾V城嘅兩隻年幼熊貓已經喺今日朝早到達。熊貓入住嘅主題公園表示，已經將熊貓館重新裝修，務求俾兩位新成員一個五星級的家，又期待兩位能夠早啲喺V城開枝散葉。兩隻熊貓暫時重未曾改名，熊貓公開命名嘅活動已經收到超過六千份建議，有關方面會篩選出最後十個最受歡迎嘅名字，攞出嚟俾公眾作全民電子投票。
七叔放下報紙，望向電視機，爆出一句粗話，然後又回到報紙上去。
茶餐廳其實一點也不舒服，但我還是經常來光顧。無論任何時分，茶餐廳的食客也只是那幾個老人。在牛棚藝術村出入的年輕文化人，間中也會帶著懷舊的心態聯群結隊過來幫襯，帶來短暫性的熱鬧。我問過老闆七叔，知道好運茶餐廳已經有超過五十年歷史，七叔亦由年輕時的夥計變成老闆。霉舊的塑料木紋牆板扭曲變形，邊緣已像樹皮般剝落，四處也有用膠紙和釘子縫補的痕跡。天花板上呆著一把鏽蝕的老式吊扇，像一隻巨大的乾硬的蟲屍，相信已經不能開動，扇葉上鋪滿寄生植物一樣毛茸茸的灰塵。取而代之的是牆上的兩把也不算年輕的電風扇，補充著聊勝於無的空調。也許是開放式廚房通風不良，空氣中同時滲透著一股潮濕的、悶熱的氣息。隨著風扇的擺動，冷氣和熱氣交替襲來，氣味也時而清爽，時而酸腐。在整個因陳舊而變得暗啞不明的場景中，唯獨是牆上那台闊屏幕高清電視機的畫面稜角分明、色彩鮮艷，形成極不協調的反差，好像在古裝片裡看到演員袋中露出的手機那樣的穿崩的感覺。
我一邊吃午飯，一邊閱讀《飢餓藝術家》的劇本。我吃的是蕃茄薯仔飯，原本是配牛肉的，我因為食素，所以要求「走牛」。幫襯多了，老闆七叔和夥計歪哥都知道我的口味，總會給我的飯「走肉」和多加一點素菜。電視機上的節目，也是餸菜的一部分，少不免給擾亂了思緒。我在想，飢餓藝術似乎跟樓價和熊貓無關，但又並不盡然。呷了口奶茶，思緒回到卡夫卡的飢餓藝術家和取代他的那頭年輕的豹。我直覺認為，那一定是一頭雌豹。