愛菲旋轉 - 1. 牛棚觀音（3）
物種源始．貝貝重生 #6
多年沒見，愛詩依然是那麼的漂亮，甚至是更加漂亮，化妝和打扮也完美無暇。她留一個清爽的及肩髮型，穿著淺綠色小白波點連衣短裙，細帶子高跟涼鞋，感覺簡潔而高雅。那跟以前在戲劇學院一起通宵排戲，一起在排練室打地鋪和偷偷煮食的愛詩完全不同，但在迷人的假眼睫毛下面，那鎖定目標的眼神卻依然沒變。
（愛菲回去拿茶杯，到愛詩的位子坐下來。兩人互相對望，只是含笑，神情就像照鏡子一樣。）
菲：點解會咁嘅？
詩：真係難以置信！
菲：Helena，你信唔信，我剛才諗起你！
詩（熱情地拉著愛菲的手）：我都係呀！愛菲！我頭先一諗起你，Virgil，即係嗰位經理先生，就喺我旁邊話：你係唔係搵緊朋友？我於是望過來，點知真係見到你！
菲（回過頭去）：但係嗰位經理點知道――
詩：怪唔得個靈擺喺度不停咁打轉，我重以為出咗咩事！
（愛菲望向桌上，上面放著一部小巧輕薄的平板電腦，旁邊的一個紅色絲絨小袋子上，躺著一個小巧的球狀水晶靈擺。）
菲：你識占卜？
詩（小心翼翼地撿起靈擺）：我修讀緊靈性程式管理課程，Spiritual Programming。
（投映）愛詩把平板電腦擺在我面前，屏幕顯示的是一個圖表，上面繪畫了複雜的圖形，圖形之間有許多連線，所有標籤也以英文表出。中間最顯著的是一個三角形，上角是 Goddess，左下角是 Priestess，右下角是 Empress。從 Priestess 至 Goddess 的連線是Way of Aletheia（Truth），從 Empress 至 Goddess 的連線是 Way of Doxa （Opinion），Priestess 和 Empress 之間的連線則是 Mirror（anti-self）。
菲（好奇地）：你想把握自己嘅命運？
詩：邊個唔想？不過，SP 唔係做預言嘅，而係管理自己嘅生命紀錄，改善自己嘅靈性程式，從而調整自己嘅精神能量。簡單啲講，人嘅生命就好似電腦程式一樣，會累積不良資訊，會出現 bugs，會被 hack 或者感染，或者純粹不勝負荷。所以，靈魂都要不停咁update 同 upgrade。
菲：聽落都幾有趣！
詩：你有興趣嘅話，搵日幫你做個詳細嘅 scanning 同 clearing。
菲：一定！
（愛詩意會到時機不對，把靈擺收拾好，關上平板電腦，望著愛菲，流露著不可思議的神情。）